زانکۆیا نەورۆز ئێکەمین زانکۆیا کەرتێ تایبەتە ل سەرانسەری هەرێما كوردستانا ئیراقێ هاتیە دامەزراندن، کو مێژوویا وێ بۆ سالا ٢٠٠٤ێ ڤەدگەریت. د ڤان ٢١ سالان دا، زانکۆیا نەورۆز شیایە پێگەهەکێ بلند یێ ئەکادیمی و زانستی د ناڤ زانکۆیێن حکوومی و تایبەت دا ل هەرێما کوردستانێ و ئیراقێ درست بکەت، و ل رێزبەندا نیشتمانی یا وەزارەتا خواندنا بلند و ڤەکۆلینێن زانستی پلە B وەربگریت، کو بلندترین پلەیە زانکۆیێن هەرێمێ گەهشتينێ.
ڤێ زانکۆیێ ژ دەستپێکەکا بچویک دەستپێکر، لێ هەر زوی شیا بەرفرەهـ بیت و هەوجەییا بازارێ کاری تێر بکەت. نۆکە زانکۆیا نەورۆز ژ حەفت کولیژان پێکدهێت: کولیژا یاسا و زانستێن سیاسی، کولیژا کارگێری و ئابووری، کولیژا زانست، کولیژا زمان، کولیژا ئەندازیاری، کولیژا پزیشکیا ددانان، و کولیژا دەرمانسازیێ. ئەڤ حەفت کولیژە ژ نێزیکی ٢٠ پشکێن ئەکادیمی یێن جۆراجۆرا پێکدهێت و هەردو وارێن مرۆڤایەتی و زانستی بخۆڤەدگریت، وەکی پشکێن: یاسا، زانستێن سیاسی، ئابوور، کارگێری کار، ژمێریاری، دارایی و بانک، زانستێن گەشتیاری، بازارگەریا ئەلکتروونی، کارگێریا راگەهاندن و رۆژنامەڤانیێ، زمانێ ئینگلیزی، زمانێ کوردی، وەرگێران، کوردناسی، زمانێ فەرەنسی، دەروونناسی، زانستێن کومپیۆتەری، تاقیگەهێن زانستێن پزیشکی، ئەندازیاریا تەلارسازی، ئەندازیاریا شارستانی، ئەندازیاریا کومپیۆتەر و گەیاندنێ، و ئەندازیاریا پروگرامسازی. ئەڤە زێدەباری دامەزراندنا چەندین و سەنتەرێن پالپشت بۆ ڤان کولیژان و بۆ خزمەتا جڤاکی، وەکی سەنتەرێ پێداگۆجی، سەنتەرێ ڤەکۆلینێن زانستی و پێشخستنێ، سەنتەرێ راوێژکاریێن ئەندازیاری، سەنتەرێ راوێژکاریێن یاسایی، سەنتەرێ گەشەپێدانا کاری، سەنتەرێ دلنیا جۆری، سەنتەرێ جێندەری، و.. هتد.
تا نۆکە نێزیکی ١٢هزار قوتابی ژ کچ و کورێن کوردستانێ و ئیراقێ ژ ڤێ زانکۆیێ دەرچووینە. زانکۆ ل سەر رووبەرەکێ ئەردى یێ گونجای هاتیە ئاڤاکرن و کەمپوسەکا ب رێکوپێک و سەردەمانە هەیە، کو پێکهاتیە ژ چەندین بالەخانەیێن زانستی ل گەل پەرتووکخانەیەکا ناڤەندی یا دەولەمەند، گەلەریەکا مودێرن، خوارنگەهـ و کافیتیریایەکا نووژەن، باخچەیێن کەسک و خەملاندی، جهێن وەرزشی و بێهنڤەدانێ، ستەیجەکێ مەزن بۆ گێرانا هەلکەفت و ئاهەنگێن قوتابیان، هۆلێن بەرفرەهێن جۆراوجۆر بۆ بەستنا کونفرانس و کۆمبوونان ل گەل لابۆرێن کومپیۆتەری و پارکەکا زەبەلاح یا مودێرن بۆ راوستیانا ترۆمبێلان. زانکۆیا نەورۆز ناڤەندەکا ئارام و خۆشە، دکەڤیتە رۆژئاڤایێ سەنتەرێ باژێرێ دهۆکێ و هەر سال دەرگەهێن وێ بۆوەرگرتنا نڤشێن نوی یێن قوتابیان دڤەکرینە.