د ڕێوڕەسمەكێ تایبەتدا و ب ئامادەبوونا ڕۆژنامەڤان و سازیێن ڕاگەهاندنێ، ڕاگریا كۆلیژا كارگێری و ئابووری ل زانكۆیا نەورۆز پشكا "كارگێریا ڕاگەهاندن و ڕۆژنامەڤانیێ" بۆ سالا نوی یا خواندنێ 2023-2024 ڕاگەهاند.
د پەیڤەكێدا سەرۆكێ زانكۆیێ پ. د. عەبدولوەهاب خالد مووسا پیرۆزباهیا ڤەكرنا پشكا ناڤبری ل ڕاگەهاندكار و دەرچوویێن ئامادەیی، پیشەیی و پەیمانگەهێن دوو سالی كر و هیڤیا خزمەت و پاشەرۆژەكا گەش بۆ قوتابیێن ل ئەڤێ پشكێ دهێنەوەرگرتن خواست. ل دویڤدا د. كاوە عەبدولعەزیزی ئاماژە ب گرنگیا كارگێڕیا ڕاگەهاندنێ ل سەردەمێ تەكنۆلۆژیا و پێشكەڤتنێ دا، هەروەسا بەحسێ چاوانیا ڕێكخستن و برێڤەبرنا كاروبارێن كارگێریێن ل دەزگەهێن ڕاگەهاندنێ كر. پاشی پ. د. حكمەت ڕەشید سولتان وەكو ڕاگرێ كۆلیژێ ب هویری هەر تشتێ پێدڤی ل سەر خواندنا چار سالان ل پشكا كارگێریا ڕاگەهاندن و ڕۆژنامەڤانیێ دیار كر.
ل دووماهیێ، دەرگەهێ دانوستاندنێ هاتەڤەكرن و ئامادەبوویان پرسیار و تێبینیێن خۆ ئاراستە كرن.